Bamusazeeko obusajja
Mugarura ng’ali mu nnaku. Wakati obusajja obwasaliddwako. Ku ddyo ye Kyomugisha
Bya A. Ssengendo ne T. Kwatagye
OMUKAZI atasiba zikweya akutte akaso n’asalako omusajja akasolo gw’asangirizza ng’asobya ku muwalawe ow’emyaka 10.
Muky. Angelina Kyomugisha, nnyina w’omwana eyasobezeddwaako, yabadde alima mu lusuku n’awulira muwalawe ng’alaajana nti ‘maama bankwata’ kwe kudduukirira enduulu ataase.
Yeetooloodde emmanju mu kisiko ekiriraanye ennyumba ye gye yasanze muwalawe ng’alaajana era gye yakubye amaaso ng’essajja, Geoffrey Mugarura, 48, lifutubbadde ku muwalawe.
“Nnawunze kyokka ne nfuna obuvumu kwe kweyambisa akaso ke nnavudde nako mu lusuku ne nnumba Mugarura eyabadde aggyemu empale ne mbaka obusajja bwe ne mbunyweza mu busungu ne mbusalako,” Kyomugisha bwe yateezezza.
Kyomugisha yagambye nti akasolo ke yasaze ku Mugarura yakanyugunyizza mu kisiko.
Abadduukirize baatuuse mangu okulaba ebiguddewo bwe baawulidde Mugarura ng’atema amiranga olw’obulumi.
Abatuuze baanoonyezza akasolo ka Mugarura eyabadde atwalibwa mu ddwaaliro, wabula ne kababula. Oluvannyuma baaleese embwa y’omu ku batuuze eyakazudde.
Wabula waabaddewo katemba ate embwa eyazudde akasolo bwe yatebense nako emisinde ng’eraba efunye ekyokulya ne bakagisuuza busuuza.
Mugarura eyabadde takyasobola kwogera bulungi baamuyoddeyodde ne bamutwala mu ddwaaliro e Mbarara ng’akasolo bakazinze mu kigoye ng’abatuuze balowooza nti abasawo bayinza okukola kye basobola ne bakamuzzaako.
Wabula akulira eddwaliro ly’e Mbarara, Dr. Placid Mihayo bwe yeekebezze akasolo kano n’ategeeza nti kaabadde koonoonese nnyo ng’obusimo bufudde era nga tekakyasobola kuzzibwa ku nnyiniko.
Dr. Mihayo yagambye nti Mugarura takyaddamu kwegatta na mukazi n’afuna ssanyu lya mukwano obulamu bwe bwonna kubanga akatundu k’akasolo ke yasigazza tekalina kye kayinza kukola yadde okufuna obusimo okuggyako okumuyamba okufuka omusulo gwokka.
Gye buvuddeko munnyabyabufuzi ateerya ntama Miria Matembe yaleeta ekirowoozo ekyokulaawa abasajja abasobya ku baana n’abo abakwata abakazi ku mpaka.
AKAFANANYI KALEMEDEYO NAYE BAMBI MULISA MANYI OKUTWALIZA AWAMU YABADDE AWELAMU GULEVI.KUBA BWEWETEGELEZA ENTUNDU KIKAAA.
