Laavu okukunyumira gisseemu obugambo obuwoomu



LAAVU okubanyumira yeetaagamu obugambo obuwoomu, ng’owaana munno.



Munno mugambeko nti; ddaali buli lwe nkulabako omubiri gunsusukirira. Kino kitegeeza nti buli lw’olaba omwagalawo obanga akubiddwa amasannyalaze.



Oyinza okumugamba nti swiiti onsula ku mutima nga lufuba. Ekitegeeza nti buli w’obeera oba olowooza ye.



Muwaaneko nti mukwano oli kasonsomolera ng’eriggwa ly’ettovu, ekitegeeza nti omukwano guntuuka ku busomyo!



Oli nnantalabikalabika ng’ekimuli ky’endagu. Wano oba omugamba nti wa njawulo nnyo ku balala era by’akola abalina yekka.



Musuuteeko nti laavu, nkukutuka butimpa butadda mu ssasa. Ekitegeegezza nti weemalidde ku ye obulamu bwo bwonna.

Munno muwembejje nga bwe yakula obulungi. Amaaso ge ga bwe galigita mu kiwanga.



Oli kisiikirize kyange, buli we mbeera mba nkulaba. Muyiteko Kabirinnange wo. Omugambe nti buli lwabulawo n’emmere tekugendera oba tekuwoomera.



Oba mugambe nti nkwagala ng’awava erinnyo kubanga buli kiseera olulimi we lubeera.



Obugambo nga buno bw’obukozesa nga munyunya akaboozi, nako kagenda bukwakku.



Mwefeeko kubanga laavu yeetaagamu ebisoko okubanyumira n’olwekyo muve mu kwekwatakwata.



Ate abasajja muleke kulekerera bakazi bokka naye nammwe muwaaneeko bannammwe.



Bw’ova ku byange genda ku wa ngatto.

Mu bugambo obulala mulimu onsula mitwetwe nga mutwalo, oba nkwagala bisoko n’ebirala.



Wabula abaagalana mwegendereze nnyo. Abamu bakozesa obugambo buno nga tebabuggya ku ntobo ya mitima gyabwe naye nga balina kye baagala okukubbako, bambi bw’obuwulira n’osula ng’okukunadde.