‘Bajja kutunyaga’



Bya Alex Mwangu



MMENGO eyongedde etteeka ly’ettaka eriri mu bubage ekkuuli n’erabula Obuganda nti liruubirira kutwala ttaka lya Buganda.



Minisita w’e Mmengo omubeezi ow’enkuluze nga yavunanyizibwa ku kunoonyereza, David Mpanga agambye nti Gavumenti ya wakati ekoze olukujjukujju okuleeta etteeka lino enyage ettaka lya Buganda erya mayiro 9,000.



“Lwaki etteeka lino lireetebwa nga Buganda tennaddizibwa ttaka lya mayiro 9000 lye baawamba,” Mpanga bwe yeebuuzizza mu musomo gw’ettaka ku mbuga y’essaza ly’e Kyaggwe e Mukono ng’akiikiridde Katikkiro Emmanuel Ssendaula ku lwomukaaga.



“Twekolemu omulimu tukomye okutunda ettaka twongere n’okusaba Federo tufune obuyinza okwekolera ku bizibu byaffe. Ab’ebibanja abanaaweebwa satifikeeti bajja kugwa mu buzibu kubanga gavumenti eyinza okubaleega omusolo n’ebawambako ebibanja byabwe nga balemereddwa okugusasula,” bwe yagambye.



Omulongo Wasswa Kanakulya Bbanga yagambye nti bwe yali Ssentebe w’akakiiko k’ettaka aka Disitulikiti ya Mukono, gavumenti yabatwala mu musomo e Jinja n’ebalagira okuwa abantu abaagala ebyapa ku ttaka lya mayiro 9,000.



“Baatugamba nti ettaka ya bannayuganda bonna, era abaagala ebyapa mubibawe nga bya nkomeredde,” Bbanga bwe yagambye n’alabula Mmengo eve mu kuteesa kubanga gavumenti ekola kiguumaaza n’etteesa nga bw’egabana ettaka lya Buganda.



Erias Lukwago (Kampala Central) yasabye abantu okweyambisa obukodyo bwa Chakamchaka okuwakanya gavumenti ku tteeka lino.



Ssentebe wakakiiko kano, Betty Nambooze yasabye Abaganda bawagire ekiteeso ekisengula ekibuga Kampala bakitwale awalala ng’erimu ku makubo aganaataasa okubbibwa kw’ettaka lya Buganda.