‘Abaganda mulwanirire ebyammwe‘



Bya Godfrey Kigobero



OMUBAKA Beti Kamya (Lubaga North) anenyezza Abaganda olw’okulemwa okwegattira awamu mu kulwanyisa ebikolwa ebivvoola obuwangwa baabwe n’okubamalako eddembe.



“Mu kiseera kino tuli mu kulwanyisa etteeka ly’ettaka n’ekya Gavumenti okweddiza Kampala, kyokka bwe tubagamba tukwatize wamu nga mutulekerera nga batukuba ffekka ttiyagaasi,” bwe yeemulugunyizza.



Yabadde mu lukung’aana olwategekeddwa omubaka wa Kyandondo South mu Palamenti Mw. Issa Kikungwe, mu Para Zooni e Namasuba ku Ssande.



Ate akulira ekibiina kya CP. Mw. John Ken Lukyamuzi yanenyezza Pulezidenti Museveni obutasooka kussaawo kakiiko okutalaaga eggwanga nga kannyonnyola abantu ku tteeka ly’ettaka.



“Abaganda batujereze ekimala naye kino ky’ekiseera naffe okugaana,” bw’atyo Lukyamuzi bwe yagambye wakati mu kukubirwa emizira okuva mu baabadde mu lukung’aana.







Published on: Wednesday, 23rd January, 2008