Munno mufunire erinnya ericamula





MBALAMUSIZZA bawala ne batabani bange. Leero njagala tutunuulire amannya ge muyita bannammwe abo abababugumya nga muli eyo mu kitanda. Owuwo omuyita otya? Omuyita ‘maama Naaki’ ng’abalala awaka bwe bamuyita?



Mmanyi abamu ku mmwe temufaayo ku mannya ge muyita baagalwa bammwe bano naddala nga muli eyo ku kisenge babagabira amasaza. Wabula bw’otofaayo kumuyita linnya erinaamucamula ne by’okola tebijja kumunyumira. Ggwe ng’omusajja oteekwa okugunjaawo erinnya erimumanyisa nti ye ggwe amuleetera ebisulo mu bisambi.



Waliwo amannya ge muyita abaagalwa bammwe ne gabamalako ne laavu, era we batuukira mu kisenge nga buli kimu bakikola kutuusa mukolo. Ekibi nti abasinga ensonga za laavu temuzitwala ng’ekikulu, kye mukuliriza kimu kya kwegatta.



Munno oyinza okumuyita Namboozi, amakulu nti y’akuwa emboozo y’omu buliri ekunyumira, era buli lw’awulira ng’ebisulo bimusala mu bisambi ng’acamuka. Olwo lwaki taakubeerere munyuvu mu kisenge? Oba osobola okumuyita Kasonsomolera ng’omugeraageranya ku liggwa ly’ettovu. Oyinza okumuyita okusinziira ku bitundu by’omubiri gwe gamba nga Maasombira, bulawuni, kabinandoddo oba sigiri, okulaga nti alina ebbugumu ly’oyagala mu buliri.



Kye mulina okumanya nti omukwano gwetaaga okuwaana era buli lwe kutabeerawo ebintu tebitambula bulungi.



Buli lw’omuwa erinnya erimwawula ku bantu abalala kimulaga nti omwagalira ddala era buli w’omutuukirako abeera ayidde.





Published on: Wednesday, 16th July, 2008